“İqtisadi forum” jurnalının KPMG İnternational şirkətinə istinadən verdiyi məlumata görə, ən aşağı vergi dərəcəsi Bolqarıstandadır. Bu ölkədə gəlir vergisinin ən yüksək həddi 10%-dir. Litva, Çexiya, Rumıniya, Macarıstan və Slovakiyada maksimal vergi dərəcəsi 15%-dən 19%-ə qədər dəyişir və Avropa Birliyi üzrə orta göstəricidən 2 dəfə aşağıdır. 

Avropanın əksər ölkələrində gəlir vergisinin yuxarı həddi 2012-ci ildə dəyişməz qalıb. Dəyişiklik ancaq İspaniya və Fransada baş verib. Vergi yükü İspaniyada 7%, Fransada isə 4% artıb.

Bu ölkələrin hər biri müxtəlif artım yolu tutublar. İspaniyada 2012-ci ilin yanvarından büdcə kəsirini örtmək üçün əlavə vergi tətbiq edilir. Vergi dərəcəsinin artımı vergiödəyicilərinin gəlirlərindən asılı olaraq 0,75%-dən 7%-ə qədər dəyişir. İlllik gəliri 300 min avrodan çox olan fiziki şəxslər qazanclarının 52%-ni büdcəyə verməli olacaqlar. Fransada gəlir vergisinin yuxarı həddi 41%-dən 45%-ə qaldırılıb. Bu artım gəlirləri 250 min avronu ötən rezidentlərə şamil edilib.

2012-ci ildə vergi dərəcəsini azaldan ölkələr də olub. Finlandiya vergi dərəcəsinin yuxarı həddini 0,2%, Lüksemburq isə 1% azaldıb.

“İqtisadi forum” jurnalının Vergi Məcəlləsinə istinadən verdiyi məlumata görə, Azərbaycanda fiziki şəxlərdən gəlir vergisinin yuxarı həddi 25%-dir.