2009-cu ilin 10 ayın yekunlarına görə, Azərbaycan manatı dünyanın əsas valyutalarına nisbətən ucuzlaşıb. Daha çox ucuzlaşma həmişəki kimi Britaniya funt sterlinqinə nisbətən olub. Ancaq sentyabr ayı ilə müqayisədə manatın məzənnəsində bəzi valyutalara, o cümlədən dollara nisbətən bahalaşma müşahidə edilib. Bu barədə “İqtisadi forum” jurnalı Mərkəzi Bankın məlumatlarına istinadən xəbər verir.

2009-cu ilin 10 ayında ilin əvvəli ilə müqayisədə milli valyutamız son zamanlar dünyada sürətlə dəyərsizləşən ABŞ dollarına nisbətən 0,25% ucuzlaşıb. İlin əvvəlində 1 ABŞ dolları 0,8015 manat olduğu halda oktyabrın sonuna 0,8032 manata kimi yüksəlib.

Ancaq ötən ayla müqayisədə oktyabrda milli valyuta ABŞ dollarına nisbətən 0,04% möhkəmlənib.

Manat yanvar-oktyabr aylarında digər sərbəst dönərli valyutalara nisbətən də dəyərdən düşüb. Avropa Birliyinin milli valyutası olan avroya nisbətən manat 7,2% ucuzlaşıb. İlin əvvəlində 1 avronun məzənnəsi 1,1125 manatdan oktyabrın sonuna 1,1927 manata kimi yüksəlib.

Sentyabr ayı ilə müqayisədə oktyabrda manat Avropa valyutasına nisbətən 1,6% dəyərsizləşib.

Ən çox ucuzlaşma Britaniya funt sterlinqinə nisbətən olub. Belə ki yanvar-oktyabr aylarında manat bu valyutaya nisbətən 14,7% qiymətsizləşib. İlin əvvəlində 1 funtun məzənnəsi 1,1597 manatdan oktyabrın sonuna 1,3297 manata kimi yüksəlib.

Sentyabr ayı ilə müqayisədə oktyabrda manat funt sterlinqə nisbətən 3,2% qiymətdən düşüb.

Hesabat dövründə Yapon iyenasına nisbətən ucuzlaşma 1,1% olub. İlin əvvəlində 100 iyenanın məzənnəsi 0,8713 manatdan oktyabrın sonuna 0,8811 manata kimi yüksəlib. Manat sentyabr ayı ilə müqayisədə isə 1,5% möhkəmlənib.

Oktyabrda manatın rus rubluna nəzərən məzənnəsi ilin əvvəlindəki səviyyəyə düşüb. Əgər əvvəlki aylarda manatın bu valyutaya nisbətən möhkəmlənməsi müşahidə edilirdisə, oktyabr ayında əksinə olub. Sentyabr ayı ilə müqayisədə manat 3% dəyərsizləşib.