Çin artıq ABŞ-ın ən böyük borc sahibi deyil. Yaponiya onu ötərək Amerikanın xəzinə istiqrazlarını ən çox alan ölkə olub. “İqtisadi forum” jurnalının məlumatına görə, bu barədə “Sinxua” agentliyi ABŞ-ın Maliyyə Nazirliyinə istinadən xəbər verib.

Nazirliyin hesabatına görə, dekabrda dövlət istiqrazlarına tələbat səviyyəsi minimum həddə düşüb.

2009-cu ilin dekabr ayına Çin $755,4 milyard məbləğində xəzinə istiqrazına sahib olub. Həmin ilin aprelindən bəri ABŞ-ın dövlət borcuna Çinin yatırımı $34,2 milyard azalıb.

Bu azalmadan sonra Yaponiya ABŞ-ın ən böyük kreditoru olub. “Gündoğar” ölkə $768,8 milyard məbləğində xəzinə istiqrazlarına malikdir. Aprel ayı ilə müqayisədə bu göstərici $11,5 milyard artıb.

Üçüncü kreditor olan Britaniya yatırımını $24,9 milyard artıraraq $302,5 milyarda çatdırıb. Braziliyada da istiqraz alışını $3,5 milyard artırıb və $160,6 milyarda yüksəldib. Rusiya isə əksinə, payını $9,6 milyard azaldıb və $118,5 milyarda endirib.

Çinin siyasiləri və mütəxəssisləri ölkənin valyuta ehtiyatının əsas hissəsinin Amerikanın dövlət borcunda yatırılmasından narahatlıqlarını dəfələrlə səsləndiriblər. Çinin narahatlığına görə, Obama administrasiyasının anti-böran tədbirlərinə görə, ABŞ-da inflyasiya yüksələ bilər və nəticədə valyuta dəyərsizləşər.