İqtisadi Təşəbbüslərə Yardım İctimai Birliyi (İTYİB) Azərbaycanda elektron kənd xəritəsinin yaradılması təşəbbüsü ilə çıxış edib. Bu təklif kənd yerlərinin sosial-iqtisadi vəziyyətini, perspektiv inkişafını əks etdirən məlumatların elektronlaşdırılmasını nəzərdə tutur. Hər bir kəndin iqtisadiyyatını təşkil edən ayrı-ayrı sahələrin elektron xəritələr üzərində xüsusi rənglərlə fərqləndirilməsi təklif olunur.

İTYİB-in sədr müavini Rövşən Ağayev Lent.az-a bildirib ki, artıq regionların sosial-iqtisadi inkişafına yönəldilmiş tədbirlərin tədricən kəndlərin inkişafı üzərində fokuslaşdırılmasına keçidi təmin etməyin vaxtı çatıb. Bu səbəbdən hökumət özünün sosial-iqtisadi siyasətində kənd yerlərinin inkişafına daha çox önəm verməlidir. Bunun üçün yaradılması təklif olunan elektronlaşdırılmış xəritədə kəndlərin iqtisadi infrastrukturuna dair məlumatlar detallı şəkildə əks olunmalıdır.

“Beynəlxalq təcrübədə də belədir ki, inkişaf proqramının foksu olmadıqda həyata keçirilən tədbirlərin nəticələri səmərəli olmur. 2004-cü ildən Azərbaycanda həyata keçirilən regional inkişaf proqramlarının əhatə dairəsi çox genişdir, orada rayon mərkəzləri əsas götürülür. Kəndlərin inkişaf proqramı isə daha konkretdir və burada həyata keçiriləcək tədbirlərin hədəfdən yayınma imkanları son dərəcə məhduddur” – deyə, Rövşən Ağayev əlavə edib.

Təklif müəllifləri bildirirlər ki, bu, həm də kənd yerlərində iqtisadiyyatın müxtəlif sahələrinin perspektiv inkişaf imkanlarının müəyyən edilməsi üçün investorlar üçün əvəzsiz məlumat mənbəyi ola bilər. Onların fikrincə, belə bir elektron məlumat bazası yaradılsa, xarici sərmayəçilər də kənd yerlərində onları maraqlandıran sahələrə investisiya qoymaq istəyinin reallaşmasına kömək edəcək.

Elxan SALAHOV