Ukraynanın Mərkəzi Bankının valyuta ehtiyatı fevral ayında 4,5% və ya 1,14 milyard dollar azalaraq 24,15 milyard dollara düşüb. “İqtisadi forum” jurnalının məlumatına görə, bu barədə Ukraynanın Mərkəzi Bankı açıqlama verib.

2010-cu ilin əvvəlində Mərkəzi bankın valyuta ehtiyatı 8,9% və ya $2,36 milyard azalıb. Halbuki ilin əvvəlində ehtiyatın həcmi $26,51 milyard olub. Təkcə yanvar ayı ərzində ehtiyat 4,6% və ya $1,22 milyard azalıb və $25,29 milyarda düşüb.

2009-cu ildə valyuta ehtiyatı ümumilikdə 16% və ya 5,04 milyard azalıb. 2009-cu ilin əvvəlinə bu göstərici $31,54 milyard təşkil edib. 2008-ci ildə isə azalma 2,8% və ya $0,9 milyard olub.

Rusiyanın Mərkəzi Bankının valyuta ehtiyatı isə ötən ay $0,349 milyard artıb və $436,18 milyard yüksəlib.Ölkənin Mərkəzi Bankının məlumatına görə, yanvarın sonuna bu göstərici $435,83 milyard təşkil edib.

İlin əvvəlinə ehtiyatın həcmi $439,034 milyarda bərabər olub. Yanvar-fevral aylarında valyuta ehtiyatı $2,855 milyard azalıb.

Məlumat üçün bildirək ki, Rusiyanın beynəlxalq ehtiyatları Mərkəzi Bankın və Rusiya Hökumətinin sərəncamında yerləşdirilən yüksək likvidli maliyyə aktivlərini əks etdirir. Ehtiyatlar xarici valyutalar, qızıl, SDR və digər ehtiyat aktivlərindən ibarətdir.

Xatırladaq ki, Rusiya valyuta ehtiyatının həcminə görə Çin və Yaponiyadan sonra üçüncü yeri tutur.

Ötən ay Litvanın valyuta ehtiyatında da artım müşahidə edilib. Fevralda ölkənin ehtiyatı 2,96 milyard lit və ya 18% artaraq 19,4 milyard litə (5,6 milyard avro) çatıb.

Azərbaycan ın Mərkəzi Bankının valyuta ehtiyatlarının həcmi isə fevralda 1,3% azalaraq 5 milyard 74 milyon 500 min ABŞ dollarına düşüb.Ay ərzində Bankın valyuta ehtiyatı 65 milyon dollar azalıb.

Yeni ilin 2 ayı ərzində Mərkəzi Bank ehtiyatını 2% və ya 101,1 milyon dollar itirib. Halbuki 31 dekabr 2009-cu il tarixinə valyuta ehtiyatı 5 milyard 175 milyon 600 min dollar təşkil edib.

2009-cu ilin müvafiq dövrü ilə müqayisədə fevralda valyuta ehtiyatı 10% və ya 561,5 milyon dollar azalıb. Ötən ilin fevralında bu göstərici 5 milyard 636 milyon dollara bərabər olub.

Xatırladaq ki, 2009-cu ildə Mərkəzi Bankın valyuta ehtiyatı 15,6% və ya 961,4 milyon dollar azalaraq 5 milyard 139 milyon 500 min ABŞ dollar təşkil etmişdi.