Yeni il Azərbaycan bankları üçün uğursuz başlayıb. Dünya qlobal böhrandan qurtulmaq ərəfəsində olduğu bir dövrdə böhranın təsiri Azərbaycan banklarına deyəsən, indi çatır. Yanvar ayında ölkə üzrə zərərlə işləyən bankların sayı 2 dəfə artaraq 13-ə çatıb. Bu, 2006-cı ildən sonra ən yüksək göstəricidir. “İqtisadi forum” jurnalının Mərkəzi Banka istinadən verdiyi məlumata görə, ötən il belə bankların sayı 7 olub.

2010-cu ilin fevral ayının 1-i vəziyyətinə ölkə banklarının əldə etdikləri mənfəətlərin həcmi 28,08 milyon manat təşkil edib ki, bu da ötən ilin eyni ayı ilə müqayisədə 2,2 dəfə azdır. 2009-cu ilin yanvarında bu göstərici 62,56 milyon manat olub. Ay ərzində mənfəətlə işləyən bankların sayı 39-dan 33-ə düşüb.

Bu müddətdə bankların zərəri 2 dəfə artıb. İlin ilk ayında bankların zərəri 12,42 milyon manat olub. Ötən ilin yanvarında isə zərərin həcmi 7,4 milyon manat təşkil edib. Zərərlə işləyən bankların sayı isə 7-dən 13-ə yüksəlib. Bu o deməkdir ki, ölkə banklarının 28%-i zərərlə işləyib.

Fevralın 1-i vəziyyətinə bankların yekun mənfəəti 15,66 milyon manata bərabər olub. Halbuki ötən ilin müvafiq dövründə bu göstərici 54,53 milyon manat olub.