Fevral ayından etibarən ölkə iqtisadiyyatına yatırılan kreditlərin həcmində müşahidə edilən artım tendensiyası yay aylarında azalma ilə əvəz olunub. “İqtisadi forum” jurnalının Mərkəzi Banka istinadən verdiyi məlumata görə, iyul ayında kredit qoyuluşunun həcmi 184,5 milyon manat azalaraq 8,66 milyard manata düşüb. Bu müddətdə problemli kreditlərin həcmi 8,6 milyon manat azalsa da, cəmi kreditlərdə payı dəyişməz qalıb. Hesabat ayında vaxtı keçmiş kreditlərin payı 4,6% həddində qalıb.

Artıq ikinci aydır ki, Mərkəzi Bank valyuta ehtiyatını artırmağa müvəffəq olur. Ötən ay Bank ehtiyatının həcmini 5 milyard 658 milyon 500 min dollara çatdırıb ki, bu da son 18 ayda ən yüksək həddir. “İqtisadi forum” jurnalının Mərkəzi Banka istinadən verdiyi məlumata görə, ötən ay valyuta ehtiyatı 3,4% artıb.

2010-cu ilin 1-ci yarısında Neft Fondunun valyuta məzənnələrinin dəyişməsindən yaranmış büdcədənkənar xərcləri  artaraq 869,1 milyon manata çatıb. Təkcə ötən rübdə xərclərin həcmi əvvəlki rüblə müqayisədə 2 dəfədən çox artıb. Halbuki ötən ilin sonunda Fond məzənnə dəyişməsindən 97,6 milyon manat həcmində gəlir əldə edib.

Dünyada kölgə iqtisadiyyatı getdikcə genişlənməkdədir. Hazırda dünya iqtisadiyyatında onun çəkisi 35,5%-ə çatıb. “İqtisadi forum” jurnalının məlumatına görə, Dünya Bankı bu günlərdə 151 ölkə haqqında hesabat açıqlayıb.

Amerikanın “The Economist” jurnalı özünün ənənəvi Big Mac İndeksini hesablayıb. İndeksə görə, dünyada dəyəri ən çox şişirdilmiş valyuta Norveç kronudur. Paytaxt Osloda satılan məşhur hamburqerin qiyməti 7 dollardır. Jurnalın ekspertləri hesab edirlər ki, kronun dəyəri 2 dəfəyədək şişirdilib və əslində bu valyutanın dollara nisbətən dəyəri 6,25 yox 12,1 kron olmalıdır.

Rusiyada adambaşına düşən yaşayış minimumunun həcmi 2010-cu ilin I rübündə 182 dollar təşkil edib ki, bu da ötən ilin sonuncu rübü ilə müqayisədə 12,3 dollar çoxdur. “İqtisadi forum” jurnalının RİA «Novosti» agentliyinə istinadən verdiyi məlumata görə, baş nazir Vladimir Putin bununla bağlı müvafiq sərəncam imzalayıb.

Avropanın dövlət və hökumət başçıları arasında ən varlı şəxs İrlandiyanın baş naziri Brayan Kouen hesab olunur. Onun illik qazancı $342,4 min təşkil edir. Kouen dünyanın ən varlı rəhbərləri arasında 4-cü yeri tutur.

May ayında əhali tərəfindən ölkə banklarına yatırılan əmanətlərin ümumi həcmi artsa da, manat üzrə cəlb edilmiş əmanətlərin həcmində azalma müşahidə edilib.Hesabat ayında milli valyuta üzrə əmanətlərin həcmi 8,6 milyon manat azalıb. Bu barədə “İqtisadi forum” jurnalı Mərkəzi Banka istinadən xəbər verir.

May ayında manatın ABŞ dollarına nisbətən məzənnəsinin sabit saxlanılması üçün daxili bazarda aparılmış valyuta əməliyyatlarının həcmi 1 milyard 22 milyon dollar təşkil edib. “İqtisadi forum” jurnalının Mərkəzi Banka istinadən verdiyi məlumata görə, bu ötən ilin müvafiq dövrü ilə müqayisədə 2,3 dəfə çoxdur.

Neftə əsaslanan inkişaf

Neft Fondundan dövlət büdcəsinə transfertlərin məbləği ildən-ilə artdıqca büdcə gəlirlərinin formalaşmasında Fondun payı da yüksələn xətlə artır. Dövlət büdcəsinin gəlirlərində Fondun transfertlərinin xüsusi çəkisi 2004-cü ildə 8.8 faiz, 2005-ci ildə 7.3 faiz, 2006-cı ildə 15.1 faiz, 2007-ci ildə 9.7 faiz olduğu halda, 2008-ci ildə artıq 35.3 faiz həddində olmuşdur. 2009-cu ildə isə büdcə gəlirlərinin həcminin 50 faizindən çoxunun məhz Fondun transferti hesabına formalaşması gözlənilir.